Бөгүн, май 25-те Ак-Дуругнуң М.К.Өлчей-оол аттыг модельдиг ном саңынга "Хин хавы деп чүл?" деп ёзу-чаңчылдар шагы болуп эрткен. Ном саңының эргелекчизи уругларга "Хин хавы деп чүл?", ону каяа, канчаар ажыглап чораанының дугайында тайылбырны көргүзүп тургаш, чедимчелиг кылдыр тайылбырлап берген. "Хин хавы" дээрге чаш төлдүң төрүттүнген соонда хинин шыгжаар камгалалы болур. Хин хавын даараарда, оол уруг болза көк пөс-биле, кыс уруг болза кызыл пөс-биле камгалалды даараар, а чамдыкта меңгизиниң аайы-биле база пөстү шилип алгаш даарап ап болур. Чаш уругнуң хин хавын авазы азы кырган-авазы даараар чораан. Ону даарап олургаш ие кижи йөрээлдерни салып олургаш даараар: "Узун назылыг болзун, кадык болзун, улуг угаанныг болзун, эртем-билиглиг болзун дээн чижектиг йөрээлдерни ыдар. Хин хавынын даштын янзы-бүрү чинчилер-биле чараштап даарап алыр. Хин хавын эдилээрде удуур өрээлинге азып алыр. Чамдык улус хин хавын ус-кушкаштың уязынга шыгжап, эдилеп чораан дээр. А чамдык улус ажы-төлү өгленип чоруур дей бергенде аптаразынга суккаш белек кылдыр берип, дамчыдар турган дээр, а чамдык таварылгаларда сыртык иштинге суп алгаш база эдилеп чораан дээр. Шак ындыг сыртыкты "Ие сыртык" дээр турган.
.jpg)
